Zum Haaptinhalt sprangen Zum Haaptmenü sprangen

Haff

Haff


Sortie_2026.jpgEise Spillhaff ass e wichtege Beräich vum Maison Relais, wou d’Kanner d’Méiglechkeet
hunn, dobaussen an der frëscher Loft ze spillen, sech ze beweegen an Zäit matenee ze
verbréngen. Et gëtt genuch Plaz, fir datt d’Kanner lafe kënnen, sech austoben an hir
eege Spilliddien entwéckele kënnen. Si kënnen selwer entscheeden, mat wat si sech
beschäftege wëllen an ob si léiwer eleng, mat engem anere Kand oder an enger Grupp
spillen. Doduerch kënne si hir Interessen entdecken an hir Selbststännegkeet stäerken.


Am Spillhaff steet e Klettergerüst aus Holz, dat de Kanner verschidde Méiglechkeete
bitt, fir sech ze beweegen. Si kënnen drop klammen, sech festhalen an hir
Geschécklechkeet an hiert Gläichgewiicht trainéieren. Ausserdeem kënne si
d’Klettergerüst an hir Fantasiespiller abannen. Zum Beispill kënne si sech virstellen,
datt et e Pirateschëff, eng Buerg oder en Haus ass. Dobäi kënne si zesumme
Geschichte erfannen a verschidde Rolle spillen. Eng weider Spillméiglechkeet ass eng
Seelpyramid. Si erlaabt de Kanner, ze klammen an hir kierperlech Fäegkeeten
auszeprobéieren. Dobäi trainéiere si hir Kraaft, hir Koordinatioun an hiert
Gläichgewiicht. Gläichzäiteg léiere si, hir eege Fäegkeeten anzeschätzen an op déi aner
Kanner Récksiicht ze huelen.


Zousätzlech gëtt et e klengen Hindernisparcours aus Holz, op deem d’Kanner
verschidde Beweegunge probéiere kënnen. Si kënnen zum Beispill iwwer Elementer
klammen, balancéieren oder sech selwer kleng Erausfuerderunge stellen. Si kënnen
och Beweegungsspiller erfannen, bei deenen si e bestëmmte Wee musse bewältegen.


Esou Aktivitéite fërderen hir motoresch Fäegkeeten, hir Konzentratioun an hiert
Selbstvertrauen. Eng grouss fräi Fläch vum Spillhaff bitt de Kanner besonnesch vill
Méiglechkeete fir fräit Spillen. Si kënnen Fänkches spillen, lafen, mat engem Ball spillen
oder zesummen nei Spiller erfannen. Zum Beispill kënne si eng Course maachen, sech
géigesäiteg de Ball zouwerfen oder sech virstellen, datt si zesummen op eng
Abenteuerrees ginn. Dobäi hu si genuch Plaz, fir hir Spilliddien ëmzesetzen a mateneen
ze interagéieren. Beim gemeinsame Spille léiere si, Reegelen auszemaachen,
Entscheedungen ze treffen a Konflikter ze léisen.


Am Spillhaff stinn och verschidde Bänken an Dëscher. D’Kanner kënnen do raschten,
matenee schwätzen oder méi rouegen Aktivitéiten nogoen. D’Dëscher eegne sech och
fir Rollespiller. D’Kanner kënnen zum Beispill e Restaurant, e Café oder e Verkafsstand
spillen. Dobäi iwwerhuele si verschidde Rollen, tausche sech mateneen aus an
entwéckelen zesummen nei Iddien. Eng weider Ausstattung vum Spillhaff ass eng
grouss Spillkëscht mat verschiddene Spillsaache fir dobaussen. D’Kanner kënnen
d’Spillsaachen selwer eraussichen a fir verschidde Spiller benotzen. Zum Beispill kënne
si mat Bäll werfen, fänken oder sech de Ball géigesäiteg zouspillen. Je no verfügbarem
Spillmaterial kënne si och kreativ Spiller entwéckelen oder zesummen nei Aktivitéiten
ausprobéieren. Nom Spille kënnen si d’Spillsaachen nees an d’Këscht raumen a léieren
esou, Verantwortung fir dat gemeinsam benotzt Spillmaterial ze iwwerhuelen.